Нарӑсӑн 21-мӗшӗнче пӗтӗм тӗнче тӑван чӗлхе кунне паллӑ тӑвать. Ку уява ЮНЕСКО 1999 ҫулта иртнӗ 30-мӗш Генераллӑ канашлӑва пӗтӗмлетнӗ май ҫирӗплетнӗ. Уява чӗлхесен тата культурӑсен нумайенлӗхне упраса хӑвармашкӑн йӗркеленӗ.

     Ачасене тӑван чӗлхене юратма, упрама вӗрентес тӗллевпе нарӑсӑн 20-мӗшӗнче И.Н.Ульянов ячӗллӗ Хутарти вӑтам шкулта 7,8 классенче «Тӑван чӗлхе - эс вӗҫӗмсӗр тӗнче» ятлӑ мероприяти иртрӗ. Вӗренекенсем тӑван чӗлхе ҫинчен сӑвӑ калас, юрлас, тупмалли юмахсен тупсӑмне тупас тата ваттисен сӑмахӗсене ӑнлантарас енӗпе хӑйсен пултарулӑхне кӑтартрӗҫ. Ачасем тӑван чӗлхене аталантарасси кашни чӑвашӑн тивӗҫӗ пулнине ҫирӗплетрӗҫ.