2019 - мӗш çулхи ака уйӑхӗн 2-мӗшӗнче И.Н.Ульянов ячӗллӗ Хутарти вӑтам шкулӑн 8-мӗш класс вӗренекенӗсем модельнӑй библиотекӑра чӑваш писателӗсемпе тӗл пулчӗç. Унта Сергей Павлов, Елена Светлая, Раиса Воробьева тата Альбина Юрату çыравçӑсем килсе çитрӗç. Вӗсем чи малтанах пурне те Тӗнчери ача-пӑча кӗнекисен кунӗ ячӗпе саламларӗç, кайран хӑйсен хайлавӗсемпе паллаштарчӗç. С.Павлов хӑйӗн «Асамлӑ кӗпер» автобиографилле повесть çинчен калани ачасемшӗн уйрӑмах кӑсӑклӑ пулчӗ. Вӗренекенсем çыравçӑсемпе тӗл пулнӑ хыççӑн питӗ кӑмӑллӑ юлчӗç, тӗрлӗ сӗнӳсене шута илсе пӗтӗмлетӳ турӗç: пур енлӗ аталаннӑ çын пулас тесен кӗнекесене ытларах вуламалла, хамӑрӑн тӑван чӗлхепе калаçмалла, ӑна упрамалла.